Oilyo yoUDP otai pula Muyongo aaluke Oilyo itatu yongudu yoUnited Democratic Party (UDP) okwa li ya kwatwa po pakafimbo Etitatu konima kwa li ya kwatela komesho ehololomadilaadilo inali pitikwa la yuka kombelewa yangoloneya, Lawrence Sampofu, koKatima Mulilo opo va ka yandje omukanda wavo. Ovanhu ava kakwa li va patululilwa oshibofa ashike okwa li va ningilwa omapulaapulo nokonima okwa li va efiwa nomayele kutya nava landule omilandu domondjila doipambele yopolitika. “Kakwa li lela ekwatepo. Okwa li ashike va kufwa po ponhele opo ndee tava pewa omayele awa kombinga yomilandu doinima ya pamba opolitika nomangudumano,” Omupopiliko wopolifi yaNamibia koshitopolwa oko, Inspekta Kisco Sitali, osho a ti ngaho. Ongudu yoilyo yoUDP okwa li ya ongala pomatala omalandifilo aKatima Mulilo, opo kwa li tava ingida nokwiimba, tava pula omuleli Mishake Muyongo aaluke, oo paife e li moDenmark, a tote epangelo. Muyongo okwa li omuleli wonghendabala oyo ya dopa momafiku 02 Auguste 1999, i topole ko oshitopolwahoololo shaCaprivi kuNamibia. Ovayambididi vaye okwa li va kwatelwa meenamanana doita di li ominge nepangelo opo di kufe ko okanunu kaCaprivi, onghendabala oyo kwa li ya hanaunwa po ketanga leameno laNamibia moule womafiku ashona, osho kwa li sha eta ovanhu vahapu va mangwe po shi na sha nokukala ominge nepangelo nokukengelela oshilongo, mokati ashike kaikwao. Omukanda, washainwa komunashipundi Vasco Kabata nahamushanga Ronnicah Sipiho, otau pula ku pitikwe oshitopolwahoololo shaZambezi/Caprivi Strip shi liwilike shoo vene. Otau ti vati “Ovakaprivi otava ningilwa omahepeko, otava dipawa, otava mangwa po nokuningilwa omatilifo kepangelo laNamibia,” notau pula opo pe na “omeendo Ovakaprivi ovo kwa li va dipawa nokufudikwa paholamo kepangelo laNamibia nomidimba odo da kana okudja mokila.” Ongudu yoUDP oya indila Presidente Netumbo Nandi-Ndaitwah opo a lombwele etanga leameno laNamibia li dje mo mwaasho hava ifana “Caprivian territory.” omukanda natango owa ti, “Otwa hala okutota epangelo letu napresidente wetu Mishake Muyongo. Ovanhu vamokanunu kaCaprivi otava pula ovanadolongo aveshe vopolitika vaCaprivi va kufwe mo meedolongo moNamibia nokwaalula ovo ve li kondje yoshilongo meendelelo.” Mokati koinima yavo oyo tava pula, ongudu natango oya pula opo omatanga eameno oSwapo aeshe a dje mo nokuyandja okanunu kaCaprivi kovakalelipo vaCaprivi (UDP). “Ohatu indile omahangano aeshe opaunyuni nomahangano opaumwene opo e lidope mo moshikumungu omu. Otwa itavela ovanhu vaCaprivi ova mona oixuna neenghono koshi yepangelo laNamibia,” Ongudu osho ya weda po ngaho. Sampofu ka li po nande Etitatu opo a dule okutambula ko omukanda wongudu ei diva. -NAMPA The post Oilyo yoUDP otai pula Muyongo aaluke appeared first on The Namibian.

#Namibia #UDP #LawrenceSampofu #MishakeMuyongo #KatimaMulilo