Enangeko laNandi-Ndaitwah inalienda nawa ngaashi li na okukala Enangeko lapresidente Netumbo Nandi-Ndaitwah okwa li la danenwa komaupyakadi ahapu omalongekida oipumbiwa noopambelewa, osho sha eta opo a feekele kutya osha fa sha ningilwa owina. Presidente vati okwa lombwela ovanambelewa vakula vepangelo kutya oshivilo okwa li sha nyanaunwa kovanambelewa vepangelo vakula ovo kufa oshitufi koIndependence Stadium ndee tave shi twala keumbo lepangelo. Eedjo di li popepi noshikumungu eshi oda koleka kutya Nandi-Ndaitwah okwa li e li ominge netokolo eli. Efiku lakula lapresidente okwa li la danenwa nomalongekido a nghundipala, oveenda okudja koilongo ya yooloka va ningwa nai nosho yo oikundaneki ya ngabekwa. Oshitufi osho sha li mumwe nedimbuluko laNamibia a wanifa eedula 35 a manguluka, okwa li tete sha tengenekwa tashi kala ko momafiku 21 Marsa koIndependence Stadium mOvenduka. Molwodula yakula pefimbo opo, okwa li nee, sha twalwa keumbo lepangelo mepakumo ashike leisho. Omapuko aa vati okwa fiya Nandi-Ndaitwah a handuka neenghono. “Okwa li e udite kutya ovalongekidi voshivilo vamwe pamwe novanambelewa vepangelo vakula okwa li va ninga omalunduluko aa owina opo ashike va danene oshitufi shaye, nande okwa li va fatulula kutya osha ningwa molwonghalo yomhepo,” Odjo osho ya ti ngaho. Odjo oya ti Nandi-Ndaitwah okwa li a hala oshivilo shi ningilwe koIndependence Stadium nande ongula yefiku a nangekwa. Omuyandji womauyelele meumbo lepangelo Alfredo Hengari okwaanya omapopyo kutya enangeko okwa li li yadi omapuko. “Onda hala okulombwela ovo tava popi oinima ihe li mondjila opo ve likaleke kokule nokuninga oshinima osho. Paife ngaha presidente okwa tala moinima ya fimana oyo ya kuma oshiwana, ngaashi okulonga oinima ya fimana. “Oikumungu oyo presidente e na nayo natango oyo yo i na sha nonghalonawa yovanhu nosho yo omaudaneko okuyandja omayakulo,” Hengari osho a ti ngaho. ‘EDUNDAKANO KESHE PAMWE ‘ Enangeko natango ola tala kokuhafimaneka omilandu dopambelewa, Ovanembelewa vaNamibia ovo va li tava kwatele oshivilon komesho vati ova dopa okutambula ko presidente waMozambique Daniel Chapo eshi a fika meumbo lepangelo. Omulopoti wokondje yoshilonga ota kutiwa vati oye a lombwela ovanambelewa ovo kwa li tava kwatele oshivilo komesho kombinga youkwatya waye manga ina twalwa konduda yomitwe doilongo. Omupopiliko waChapo, Adilson Adinane, okwa lombwela oThe namibian kutya kakwa li nande e na eshiivo kombinga yoshinima eshi. “Inandi uda nande oshiningwanima sha sha,” Osho a ti ngaho. Omunambelewa okudja koministili yomakwatafano opaiwana neengeshefa okwa lombwela oThe Namibian omwedi wa dja ko kutya ovakalelipo voilongo vamwe vokondje yoshilongo va dja koEthiopia, Cyprus, Somalia naSeychelles kakwa li nande va pewa oyeendifo notaku tiwa vati kakwa li va hafela oshinima eshi. “Oinima ihapu inai enda nawa. Okwa li pu na edundakano hamumbala keshe pamwe – kapwa li oyeendifo yovafimanekwa okudja kondje yoshilongo, omilele kakwa ve di panda, oveenda okwa li va teelela efimbo lile opo va ka talwe, navamwe okwa li ve na okulongifa omuvelo vokomesho opo va dule okuya koyeendifo yavo,” Odjo sho ya ti ngaho. The Namibian okwa li yoo vali a lombwelwa kutya ongudu yovakalelipo vaAmerica kakwa li ya tambulwa ko komukwatali komesho woshivilo. Omutumwa kalelipo waCyprus, Antonis Mandritis, okwa ti oshinima eshi kashi pe pomanangeko eepresidente. “Ekufombinga lomutumwakaleipo akula moshivilo eshi sha fimana edidiliko lomakwatafano awa pokati kaNamibia naCyprus nohatu ninge eenghendabala keshe efimbo opo tu yambule po omakwatafano okudja keembinga adishe pokati koilongo yetu ei ivali,” Omuyakuli wopaumwene waMandritis, Laura Stavrou, osho a ti ngaho moiimeila oshivike sha dja ko. Omupiliko wombelewa yaEthiopia, Roman Adane, okwa ti ke shi ngee omukalelipo waEthiopia okwa li a ya kenangeko oko. EHANDU LOVAFIMANEKWA Nandi-Ndaitwah momapulaapulo noAl Jazeera oshivike sha dja ko okwa koleka kutya presidente waAmerica Donald Trump okwa li a tuma ko omukalalipo kenangeko laye. Ashike omunhu ou vati kakwa li nande a hafifwa koshivilonangeko eshi. Confidente oivike ya dja ko okwa li a lopota kutya ovatumwakalelipo vaAmerica kakwa li va hafa natango konima kwa li va tulwa poshitaafula shimwe naavo va Venezuel. Omakwatafano opambelewa pokati kepangelo laVenezuel nolaAmerica okwa kala a nghundipala. Ombelewa yaAmerica moNamibia oya lombwela oThe Namibian “ombelewa kai na eshi tai ti ko koshinima eshi paife”. Eshi kwa li a dengelwa a tye ko sha omuunganeki akula Leonard Iipumbu okwa ti ke na nande eshiivo ngee opu na omilandu dimwe inadi landulwa nawa pefimbo loshitufinangeko. “Kandi na eshiivo laasho. Shuna kodjo yoye. Ou e ku lombwela, inda ndee to ka pula omapulo oo,” Osho a ti ngaho. Omukulunhuwiliki womakwafano neengeshefa dopaiwana Penda Naanda okwa ti kapwa li nande oupyakadi washa eshi presidente waMozambique a fika ile kombinga ngaa yakeshe omutwe woshilongo kwa li wa holoka. “Shimwe vali, oministili kakwa li nande ya lombwelwa sha kombinga yomapuko omalongekido ile ovakalelipo vokondje yoshilongo inava pewa oyeendifo neholoke po lavo okwa li la tambulwa ko ngaashi shi na okukala,” Osho a ti ngaho. Presidente wongudu yoPopular Democratic Movement McHenry Venaani, oo naye kwa li a holoka koshitufi oko, okwa ti okwa mona eeminista dihapu dokondje yoshilongo tadi kongo oipundi pefimbo lenangeko. “Onda mona eeminista dihapu dokondje yoshilongo tadi kongo oipundi, onghee nee heeno, okwa li pu na omapuko, ashike onda mona oinima ya pita po pwaashi nale,” Osho a ti ngaho. Pakuweda po Confidente Etitano okwa li a lopota kutya ovatumwakaleipo vaChina okwa li vaanya oikulya oyo kwa li va pewa. Vati oshinima eshi ove shi ninga opo va holole kutya inava panda eshi va kalifwa pamwe naVenaani shaashi vati okwa li oveenda voSwapo koshivilo oku. ‘INAVA HAFA’ Kakele koshivilo sha li shi hadi, ovanambelewa veameno vokeumbo lepangelo vati ovaanyena oikundaneki yopaumwene omhito iwa opo i dule okufaneka nawa moshivilo eshi shopandjokonona. Hangaashi eepresidente dikwao, omhito yokufaneka presidente wotete womukainhu waNamibia okwa li ashike ya pewa oohandimwe. The post Enangeko laNandi-Ndaitwah inalienda nawa ngaashi li na okukala appeared first on The Namibian.

#Namibia #NetumboNandiNdaitwah #OvaNambelewa #IndependenceStadium #NewsNamibia