Ngoloneya waKunene a tya ko sha keenamanana dokufukula oikwamina koshitopolwa oko
Ngoloneya woshitopolwahoololo shaKunene Vipuakuje Muharukua okwa pula ovanhu ovo ve na eenamanana komnbinga yokupatululula omina yedina Goantagab i li popepi noKhorixas opo va twale ouyelele kombinga yoshikumungu eshi kombelewa yaye.
Oshinima eshi oshe ya konima kamusela omukulunhu welelo lopamufyuululwakalo laDaure Daman, Herman Naruseb a shangela ngoloneya opo a ye mo meenamanana omu, odo da yuka keemhangu.
“Exulifepo loinima yokufukula oikwamina ola kuma oshiwana, unene ngaa oilyo oyo kwa li ya kutwa pakafimbo pefimbo loilonga yomina yefimbo lixupi. Ekanifo loiyemo la etwa koshinima eshi otali twikile nokukuma omaxupilo nomalimbililo kombinga yonakwiiwa yoproyeka ei otaa ningi ahapu,” Naruseb osho a nyola ngaho.
Omina yaGoantagab oi li moSorris Sorris, koshi yelelo lopamufyuululwakalo laDaure Daman.”
“Omukanda oo nda tuminwa koshiwana shaDaure Daman ondi u shi ndee ombelewa yange oya pula ovakufimbinga opo va ete omadilaadilo avo, nonda teelela omanyamukulo okudja kuvo,” Ngoloneya osho a ti ngaho.
Momafiku 16 Mei, ombelewa yangoloneya oya shangela kuTimoteus Mashuna, mwene woikwamina yokoGoantagab noUltimate Safaris, ehangano lomatalelepo tali longele monhele omo.
“Ombelewa oya mona kutya Ultimate Safaris naTimoteus Mashuna ova kwa telwa meenamanana edi doikwamina moshikandjohoololo shaDaures notava kongo omapotokonono eenamanana edi.
Ngoloneya okwa yeleka efimano lomatalelepo, okukwatela po okukaleka po inamwenyo noimeno nokufukula oikwamina moshiwana shetu noshitopolwahoololo . . . nota pula nefimaneko linene mu ete omaliudo eni kombinga yoshikumungu eshi,” Omukanda osho wa ti ngaho.
Muharukua okwa ti oshinima eshi otashi mu vatele opo a kale e na eudeko la wana kombinga yoshikumungu eshi nopo nee ta dulu okumona kutya oshike shi na okuningwa po.”
“Inandi hala okukala ndi na ouyelele inau wana, ashike onda itavela kutya ohatu dulu okweeta omahangano aa avali kumwe.
“Otwa hala okukaleka po, otwa hala omatalelepo, otwa hala yo okutota oilonga, otwa hala okufukula oikwamina, ndee kandi wete ngee osho sha halika apa osha yooloka kwaasho,” Ngoloneya osho a ti ngaho.
Mashuna okwa tambula ko omadilaadilo aMuharukua kutya omawa.”
Oilonga yange otai pula ashike okanhele kashona keesquare kilomita di li nhee da holama meendudu ndee eehecta adishe di dulife po2 000 odi li po doinima ya pamba omatalelepo,” Osho a ti ngaho.
Mashuna okwa ti okwa li a shangela kungoloneya mukulu Marius Sheya kombinga yeenamanana shaashi “onghalo otai i moshipala eyokomesho loproyeka oyo tai dulu okweeta omauwa ahapu koshitopolwahoololo shaKunene”.
Omunambelewa kulunhu wehangano ledina Ultimate Safaris, Tristan Cowley okwa koneka kutya okwa mona omukanda wangoloneya ashike okwa ti eenhele doinamwenye di li nhatu – Sorris Sorris, Doro Nawas noUibasen Twyfelfontein – otadi ka shanga omukanda umwe di nyamukule ngoloneya.
“Eshi oshinima shi li pokati keenhele edi dokwaamena oinamwenyo, Ultimate Safaris, Mashuna naOttilie (Ndimulunde).”
Okwa ti ita dilaadila ngee ekufombinga langoloneya otali vatele okupotokonona eenamanana odo da teelela nale oihokolola yokomhangu.
Ashike nande ongaho, ngoloneya okwa ti oku na eshiivo kutya oshikumungu eshi osha teelela oihokolola momhangu.
“Kandi wete ngee otashi dulu oku tu imba ongepangelo tu potokonone eenamanana, shaashi omukanda otau popi kombinga yokweeta oilonga, ovanhu ovo vehe na oilonga paife, sho osho oshi li shotete moikumungu yoSwapo, onghee nee otwa hala tu wapaleke osho shi li pokati komahangano aa avali, pakutala koukwatya nondjudo yeenamanana,” Osho a ti ngaho.
Ngoloneya okwa ti ota ka talela po onima ei diva.
The post Ngoloneya waKunene a tya ko sha keenamanana dokufukula oikwamina koshitopolwa oko appeared first on The Namibian.
