Va holoka momhangu molwedipayo lomonamati
Oihokolola yomulumenhu oo ta feekelelwa edipayo lomonamati, oo kwa li e na oupyakadi wopamadilaadilo, pamwe nomonamati waye umwe, oya tameka vali momhangu yopombada yaVenduka Omaandaxa, nandokotola wopaunamaiti ta koleke kutya onghalo yanakufya kaya li iwa.
Omufeekelwa, Hendrik Le Roux (61) nomonamati Borris Le Roux (31), okwa li va holoka komesho yomupanguli Philanda Christiaan nova twikila kutya kave na nande ondjo yasha mehepeko lopalutu laCarlos Le Roux (24) muApilili 2021 meumbo lavo koMariental.
Ndokotola wopaunamiti Makumba Mulolo okwa yandja oumbangi kutya Carlos okwa kala e na oupyakadi wopamadilaadilo.
Eshi ta yandje omakonakono opaunamiti, Mulolo okwa ti kakwa li ta dulu okulonga shaashi luhapu okwa li ha ningi omahaluhalu, okwa li ha kala a ngwangwana nokwa itavela moinima ihe li mondjila.
Okwa ti vali okulinyenga kwanakufya kakwa li ku li nawa nokwa kala ha mono opendjela yepangelo youlema.
Omukanda woshibofa owa ti, Carlos okwa li e na ondjokonona yokuteyaula oinima yovafeekelwa, mwa kwatelwa noshiningwanima omo vati kwa li a tomeka eumbo lavo omundilo – oshibofa osho kwa li sha kufwa mo konima.
“Oupyakadi womaliumbato anakufya owa twikila, ndee omufeekelwa omutivali koinima okwa li e udite kutya opolifi ile omayakulo opanghalafano kapu nande oumwe a hala oku mu vatela nanakufya nomaupyakadi aye,” Omukanda osho wa ti ngaho.
Otaku tiwa vati efiku olo la landulwa kwaalo mwa ningwa oshiningwanima eshi shi nyanyalifa, nakufya okwa tatula omakende eli anhe keumbo latate waye nomamanya.
Ongula ya landula, epangelo ola ti, Hendrik naBorris ova dipaya Carlos eshi ve mu fanga noku mu denga noiti yoikombe, ominino nosho yo oinima imwe ihe shiivike. Vati ova denga nomutwe waye medu.
“Nakufya okwa xulifila ponhele opo pa ningilwa oshiningwanima eshi shaashi okwa kanifa ohonde ihapu molwoshiponga osho a mona komutwe. Ovafeekelwa okwa li ve shi eshi tava ningi efimbo alishe,” Omukanda osho wa ti ngaho.
Hahende Peru Liebenberg oye a kalela po ovafeekelwa
– Nampa
The post Va holoka momhangu molwedipayo lomonamati appeared first on The Namibian.
