Okaana keedula mbali ka futwa oshimaliwa shi fike poN$700 000 shotendele yokutunga eengulu dofikola Oshimaliwa shimwe sha futwa ehangano olo la pewa otendela yokutunga eengulu dofikola moshitopolwahoololo sha//Kharas shi fike poN$700 000 okwa li vati sha futwa okaana keedula mbali. Okaana aka vati okamonakadona komukunhuwiliki ta vatele welele loshitopolwahoololo Ralph Sachika. Oshinima eshi okwa li sha etwa poluheela komuleli wongudu yoAffirmative Repositioning (AR) Job Amupanda Etine momutumba wopashiwana eshi kwa li ta pula minista wetanga leameno noipambele yoonakulwa vakulu Frans Kapofi kombinga yoshimaliwa eshi. Okwa pula oshitai shimwe shehangano ledina August 26 Holdings (Pty) Ltd shedina Auguste 26 Construction, osho kwa lopotwa kutya osha ninga omupokati wokumona eetendela kepangelo. Amupanda okwa ti kutya ehangano omafimbo amwe ohali yandje eetendele deemeliyona kookaume, oukadona vavo nokovakwapata vaavo ve li mongonga yetanga leameno. Oshiningwanima osho a tumbula kondadalunde oshi na sha notendela yokutunga eengulu dofikola di li 510 yongushu yeemiliyona N$255. Ehangano ledina Ultimate Traders CC, olo Amupanda ta ti okwa li la pewa oilonga kuAugust 26 Construction, ota kutiwa ola Titus Iipumbu oo e na ekwatafanao naSachika. Sha landula oyoongalele pokati kaIipumbu naSachika, Amupanda okwa ti oshimaliwa shi fike peemiliyona N$3 okwa li sha futwa – nepitikilo laSachika – kehangano lomalungula ledina Tushiko Internet Technologies CC. Amupanda okwa ti kutya nande oshimaliwa okwa li sha futwa kuTushiko Internet, oimaliwa okwa li ya tulwa kombaanga yehangano loTushiko Investments CC omanga inai tuminwa kombaanga yaMaria Iipumbu. Amupanda natango okwa ti kutya Maria Iipumbu okudja opo okwa tumina nee oimaliwa kovanhu va yooloka, mwa kwatelwa Titus Iipumbu oo a mona oshimaliwa shi dulife peemiliyonaN$2, omanga oN$700 000 okwa li ya tuminwa kombaanga yaLusia Jacob yoFNB, konima oimaliwa oyo ye ke lihanga kombaanga yokaana ke na eedula mbali, Robyn Sachika – omonakadona waJacob naSachika. Amupanda okwa ti, omakonakono aye okwa ulika kutya Sachika naye okwa mona oimaliwa okudja kuJacob, ya dja moimaliwa oyo ya tuminwa koTushiko Internet. Okwa ti oshimaliwa shi fike hamumbala peemiliyona N$4 osho kwa li sha tuminwa kehangano lomalungula, sha landula oyoongalele pokati kaIipumbu naSachika, okwa li yaAugust 26 Construction. “Omupokati ou August 26 Construction okwa mona otendela yokutunga eembelewa delelo loshitopolwahoololo sha//Kharas. Omupokati, August 26 Construction okwa li a yandja po oilonga kuUltimate Traders CC yokulanda nokutula mo oipundi noitaafula yongushu yeemiliyona N$3.1. “Kashi shi ngeno kutya ehangano e li lependafindani li li pokati itali dulu okulanda oipundi noitaafula kulo vene, oshe shi ashike hailwa oku na okulya. Momwaalu omu, eemiliyona N$2.9 oda futwa nale ehangano loUltimate Traders CC,” Amupanda osho a ti ngaho. Amupanda okwa ti Iipumbu okwa yandja omikanda da puka da fa da dja kuAugust 26 Construction tadi pitike eemiliyona di dje kuAugust 26 Construction da yuka kehangano lomalungula. Odula ya dja ko, Amupanda okwa li a popya kutya oministili yetanga leameno oya landa oshipaalite shohauto keemiliyona N$8. Amupanda okwa pula Kapofi kutya omolwashike ina kukufwa onghatu nande okwa li a yandja oumbangi, ta ti kutya oku wete kutya kapu na eshi sha ningwa po shaashi omwa kwatelwa ovanambelewa vakula. The post Okaana keedula mbali ka futwa oshimaliwa shi fike poN$700 000 shotendele yokutunga eengulu dofikola appeared first on The Namibian.

#Oshimaliwa #Namibia #Kharas #AffirmativeRepositioning #Amupanda