Presidente okwa pula Ovaherero nOvanama va tambuleko efiku lokudimbuluka omadipayo a nghi na nghenda Presidente Netumbo Nandi-Ndaitwah okwa pula Ovanamibia opo va kelele omatopauko molwo ashike omaliudo a yooloka kombinga yefiku lokudimbulukwa omadipayo a nghi na nghenda. Oshinima eshi okwe shipopya Etitatu pefimbo loshivilo shotete shokudimbulukwa omadipayo a nghi na nghenda koParliamente Gardens mOvenduka. “Ohandi pula Ovanamibia aveshe koonono opo va kelele keshe osho tashi eta omatopauko pokati kavo,” Osho a ti ngaho. Okwa pula yo Ovanama nOvaherero opo va tambule ko efiku olo shaashi etokolo olo kakwa li lipu ndee epangelo ola ninga osho tali dulu okuninga opo li kwatele mo ovanhu aveshe. Oshinima eshi okwe shi pula konima ovaleli vopamufyuululwakalo vamwe voiwana oyo ya ningilwa omahepeko oludi eli inava tambula ko efiku eli, tava ti efiku la totelwa epangelo. Okwa ti omadipayo a nghi na nghenda oku li ombinga yondjokonona yalaula yaNamibia ndee okwa pumbwa okudimbulukiwa paife nonoiwana tai ke ya. Okwa ti efiku eli ola eta elineekelo kOvanamibia aveshe noinakuwanifa ya faafana. “Onghee nee natu nghonopaleke oukaume wetu wokukwatela mo Ovanamibia aveshe,” Osho a ti ngaho. Presidente natango okwa ti vali eenghundafana dokufutila oshiningwa eshi shomadipayo a nghi na nghenda otadi pula komesho nawa, ashike epangelo laNamibia naGerman natango opo tee ya peudafano laxuuninwa. The post Presidente okwa pula Ovaherero nOvanama va tambuleko efiku lokudimbuluka omadipayo a nghi na nghenda appeared first on The Namibian.

#Namibia #Präsident #Ovaherero #Ovanama #Politik

Namibia ota ka dimbuluka efiku lomadipayo a nghina nghenda lwotete Omukulunhu wiliki woministili yomauyelele nomakwatafano opaunghoba Audrin Mathe okwa ti Namibia ota ka dimbuluka efiku laye lomadipayo a nghi na nghenda oshikando shotete koParliament Garders. Efiku otali ka tyapulwa mokudimbulukwa omadipayo a nyanyaleka oo a ningilwa Ovanama nOvaherero kuGermany konima yeedula di li 100 da pita. Eshi kwa li ta popi noDesert FM Etivali, Mathe okwa ti oshitufi eshi otashi ka ningwa oshoondaxa yepangelo pambelewa, popepi noAlte Feste, onhele imwe yomeenhele odo kwa li omadipayo aa a ningilwa. “Oto dimbulukwa kutya, Alte Feste, oi li popepi noParliament Garners. Natango, shaashi eshi oshivilo patululo, oshitufi eshi oko tashi ka ningilwa oko, ndee hatu ningi nee omatokolo kombinga yaa ko tashi ka ningilwa oshikando tashi landula,” Osho a ti ngaho. Mathe okwa ti, omalongekido oshivilo eshi okwa kala e li metifa oivike ihapu, ngee kashi fi eemwedi. Okwa popya kutya opu na omafaneko okupopya payukililo noiwana oyo ya kumwa koshinima eshi. Okwa ti epangelo ola kala nokukundafana novaleli vopamufyuululwakalo voiwana oyo opo shi kale oshivilo sha kwatela mo ovanhu aveshe osho sha fimaneka ominyonena adishe da ningwa. “Ashike eshi twa yuka pexulilo loshivike, okutameka moshivike tashi ya, otu na okukala hatu dulu okuyandja ouyelele uhapu, unene ngaa kutya opolohalama otai monika i li ngahelipi naau ta ka kala ta popi. Osha wana paife okupopya kutya ovaleli vetu vopashiwana otava ka holoka. Ovaleli voiwana oyo ya kumwa koshinima eshi navo otava ka holoka,” Mathe osho a ti ngaho. Okwa weda po kutya efiku lokudimbulukwa omadipayo a nghi na nghenda ola dja kokule meenghundafana kombinga yalo momudo 2016, osho sha eta epangelo li shiivife momudo 2024 kutya efiku eli otali ka dimbulukiwa momafiku 28 Mei 2025 lwotete mondjokonona. “Eepelesenda di lwopo80 dOvanama okwa li da dipawa pefimbo loshiningwanima eshi ndee nOvaherero okwa li vashonopekwa fiyo opeepelesenda 50 doshiwana shavo. Kashi fi ashike okudipaya ovanhu ashike natango okunyeka ovanhu omadu osho sha eta oluhepo loshiwana mokati kovanhu,” Mathe osho a ti ngaho. Okwa weda po kutya ovanhu okwa li va kufwa omadu avo ndee tava undulilwa mombuwa va ka fye. Mathe okwa pula ovanhu opo va konge omikalo diwa va tambule ko efiku lokudimbuluka omadipayo a nghi na nghenda, natango ta pula oshiwana opo shi longife omhito ei shi lipule kutya osha ninga eedula 35 sha manguluka paife ndee ovanhu aveshe kave na omadu. “Okudja momudo 1990, epangelo ola kendabala okulanda edu nokupotokonona omikundu doiwana oyo ya kumwa koshinima eshi, ashike ondado luhapu ohai kala i li pombada unene ngee tali landifwa kepangelo. Edu longushu yeemiliyona N$4 paife ohali kosho eemiliyona N$12. Otwa pumbwa eenghundafana doshili nghee epangelo tali dulu okumona nokutukula edu,” Mathe osho a ti ngaho. The post Namibia ota ka dimbuluka efiku lomadipayo a nghina nghenda lwotete appeared first on The Namibian.

#Namibië #Ovanama #Ovaherero #Demokratie #AlteFeste