Swapo ota lili Emeritus Stephanus Tiboth
Presidente woSwapo Netumbo Nandi-Ndaitwah okwa yandja omahekeleko kofamili yanakufya Emeritus Stephanus Tiboth, oo a xulifa koBerseba.
Tiboth okwa xulifa momafiku 26 Mei mepupi lomido di li 80 nota ka fudikwa koBerseba Oshoondaxa.
Metumwalaka la leshwa ponhele yaye komuunganeki woSwapo koshitopolwahoololo sha||Kharas, Matheus Mumbala, Nandi-Ndaitwah okwa hokolola Tiboth kutya kali ashike oshilyo nomufitaongalo wongeleka onghwaluuteli, ashike okwa li natango oshilyo nomulanduli wongudu yoSwapo woshili.
Tiboth okwa li yoo omuunganeki wongudu moshitopolwahoololo shaHardap, oilonga oyo Nandi-Ndaitwah a ti kutya okwe i longa “nawa nosho yo nomhepo youkalelipo.”
“Ponhele yongudu yoSwapo nofamili yaNdaitwah, ohandi yandje kunye, ofamili yaTiboth noshiwana ashishe momudingonoko omahekeleko ange a dja komutima pefimbo eli lidjuu.
Omwenyo wanakufya hailwa wetu Tiboth nau tulumukwe nombili,” Osho a ti ngaho.
Tiboth okwa fiya ko omukulukadi waye, ounona vaye vaheyali, outekulu ve li 21 noutekulululwa ve li vanhe.
Omonamati waye ou akula, Christian Tiboth, okwa lombwela Nampa kutya ota ka dimbulukwa xe ongomulininipiki nomunambili oo a kondjela efikopamwe loufemba waaveshe.
“Ohandi ka dimbuluka tate wange ongomunandjungu wouyuki wopanghalafano nomuxwaxwameki welunduluko iha tila. Tate wange okwa li nale e li ominge nokatongotongo manga ina ya mopolitika yongudu momido do1960; okwa itavela mefikopamwe lomaufemba aaveshe.
Otwa waimina Swapo momudo 1976 ndee okudja opo, okwa li nale omufitaongalo,” Christian Tiboth osho a dimbuluka osho.
Okwa weda po kutya xe okwa li omuunganeki woSwapo waalushe. Omanga oilonga yaye youfitaongalo ye mu imba okumona omhito mopolitika, okwa kala nokuyambula po ondjokonona yemanguluko okupitila mongeleka.
Eshi a pulwa kutya kuxe okwe li honga ko shike, okwa ti, “Onde lihonga kutya onda pumbwa okukala omulininipiki, omunambili novanhu nokukala nde lineekela keshe umwe.
Okwa longa nge kutya nandi dimbulukwe alushe kutya atushe otu fike pamwe komesho yaKalunga.”
-NAMPA
The post Swapo ota lili Emeritus Stephanus Tiboth appeared first on The Namibian.
