Oukadona ve dulife po120 otavaka kufa ombinga mOlufuko
Oukadona ve li 124 okudja keenhele da yooloka dopamufyuululwakalo ove linyolifa nale opo va kufe ombinga moshitufi shOlufuko neudo.
Omupopiliko welelodoolopa laUtapi Joolokeni Haidula okwa lombwela oNampa momapulaapulo Etine kutya oukadona ava ova teelelika va fike kendiki lOlufuko mOutapi momafiku 22 Juni 2025, omo tamu ka tameka ondjila yavo yokufukikwa.
Haidula okwa fatulula kutya Olufuko oshivilo shokufukika ovakainhu vOvawambo nokutyapula pamufyuululwakalo osha hashi dana onghandangala ya fimana mokulongekidila oukadona va ye moukulunhu.
Okwa holola kutya ovakufimbinga veedula okudja po12 fiyo 20 ohava longwa oinakuwanifwa yopamufyuululwakalo, oilonga yomeumbo nosho yo eenghedi dopamufyuululwakalo.
“Oshivilo eshi otashi lalakanene okuyandja oukwatya wopamufyuululwakalo nokuxwaxwameka oshiwana shi likwate nawa mokati kovanyasha,” Osho a ti ngaho.
Okwa weda po kutya oshivilo osha fimana mokuyandja nokukwatela po eenghedi dopamufyuululwakalo daNamibia.
“Ohatu li longekida tu tambule ko ovakufimbinga aveshe kwaasho tashi ulike kutya otashi ka kala oshivilo shimwe shiwa shopamufyuululwakalo, etyapulo liwa unene loukumwe noukwatya,” Osho a weda po ngaho.
Oshivilo osha teelelika shi ka kale ko momafiku 20 Juni fiyo efiku lotete laJuli 2025 kendiki lOlufuko kOutapi.
Omuprima minista Elijah Ngurare okwa teelelika a ka patulule oshivilo eshi.
-NAMPA
The post Oukadona ve dulife po120 otavaka kufa ombinga mOlufuko appeared first on The Namibian.
