Esther Kaapanda okwa ulikwa a ninge hamushanga womutumba wopashiwana Omutumba wopashiwana Omaandaxa owa koleka euliko laEsther Kaapanda ongohamushanga wavo. Ekoleko laye ola landula eyakulo laye lokuvatela okudja momafiku 02 Mei, nola ningwa pakulongela pamwe nekotamhango laNamibia nosho yo omilandu dokomisi yomayakulo oshiwana. “Kaapanda oku na owino weedula 30 momayakulo opashiwana akula, nondjokonona yanakupwe melelo, mewiliko lomahangano netulomoilonga lomilandu,” Omutumba woshipashiwana osho wa ti ngaho. Okwa li omukulunhu wiliki moministili yoikwamina noikwanghono nomoministli yoilonga noyeendifo, nosho yo omukulunhu wiliki ta vatele moministili yomatendululo omadu. Okwa longa yoo natango peendodo da fimana momahangano nomoikondo yopaunyuni yopaumwene. Okwa li ha longo ongomuyakuli wopaumwene womukulunhu wiliki waIbis (WUS-Denmark), nokwa li yoo omuunganeki nomutoloki woUnited Nations Transitional Assistance College. Okwa mana yo nopolohalama yomalihongo opaiwana momudo 1998 koshi yoministili yoipambele yopaiwana. Moilonga yaye, Kaapanda okwa kufa ombinga momayambulepo opaiwana okupitila melelo lopamufika nokwa kalela po Namibia moyoongelele ya yooloka yopaitopolwahoololo nopaunyuni. The post Esther Kaapanda okwa ulikwa a ninge hamushanga womutumba wopashiwana appeared first on The Namibian.

#EstherKaapanda #Namibia #Omaandaxa #WUSDenmark #UnitedNations

Zaamwani-Kamwi otashi dulika a pingene po Hengari Omuyandjimayele wapresidente Inge Zaamwani-Kamwi okwa vakelwa ko a ninge minista mupe wounamapya nounaimuna, eeshi, omeva nomatendululo omadu sha landula ekufomoilonga laMac Hengari, oo kwa li a mangwa po noshibofa shokufuta ombumbo. The Namibian okwa uda kutya Zaamwani-Kamwi, omuyandjimayele wapresidente moipambele yekotamhango noikondo yopaumwene, okwa teelelika a pingenepo Hengari. Zaamwani-Kamwi, omukulunhuwiliki mukulu woNamdeb Holdings, Omaandaxa okwa lombwela oThe Namibian kutya oku li pokudja mo mombelewa yapresidente nokwa teelela ovanhu vape ve uye mo. “Eshi oshipe kwaame. Ombili itadi dulu okukoleka eenghundana odo kwoove,” Osho a ti ngaho Zaamwani-Kamwi okwa weda po kutya ina mona nande omunhu te mu pula a kufe po oshinakuwanifa osho. “Onda hala ngeno okwa li osho shili. Fiyo opapa, inandi lombwela sha. Natango ondi li omuyandjimayele mefimbo eli lelunduluko. Ngee ovanhu ve ya, ohandi i keumbo.” The post Zaamwani-Kamwi otashi dulika a pingene po Hengari appeared first on The Namibian.

#Namibia #ZaamwaniKamwi #Politik #Omaandaxa #Hengari

Amushelelo ota futifwa komukulunhu wopolifi Omukulunhu wopolifi yaNamibia komufalandjai Joseph Shikongo ota pula omhangu yopombada i kwate po omunandjungu wopanghalafano Michael Amushelelo eshi ina fimaneka omhangu molwomapopyo aye komalungula oshivike sha dja ko. Meindilo lomeendelelo olo a yandja Etine nokwa li la pwilikinwa komhupanguli ta vatele Doris Hans-Kaumbi Omaandaxa, Shikongo ota pula omhangu opo tete i yandje elombwelo kuAmushelelo a kufe ko omapopyo kombinga yaShikongo oo kwa li a tulika kepandja laye koFacebook momafiku 31 Marsa nokupopya yoo vali kutya Amushelelo okwa li ina landula omalombwelo omhangu eshi a popya oinima i li ngaho. Shikongo okwa ti, omapopyo aAmushelelo okwa teya elombwelo lomhangu olo la yandjwa muOktoba odula ya dja ko moshibofa shenyateko ledina pokati kaShikongo naAmushelelo. Elombwelo lomhangu olo okwa li la yandjwa konima Amushelelo naShikongo kwa li va udafana okuxulifa po oshibofa shenyateko ledina omo Shikongo kwa li ta futifa Amushelelo oshimaliwa shi fike pomiliyona imwe shi na sha nomapopyo onale oo kwa li a ninga kombinga yoshiponga shi nyanyaleka omo Shikongo kwa li a kwatelwa konooli yaNamibia muDesemba 2022. Momukandaudafano omo kwa li mwa ningwa elombwelo momhangu yopombada, okwa li sha didilikwa kutya Amushelelo na yandje ombili kuShikongo noku na “okwaana pambelewa “ kutya ota kala kokule nokupopya ile nokushanga oinima ya faafana naayo Shikongo ta ti otai nyateke oukwatya nedina laye. Shikongo ota ti kutya Amushelelo natango okwa li a twikila nokunyateka edina laye komalungula oshivike sha dja ko, ndee oshinima eshi okwa li shi li ominge nelombwelo lomhangu olo kwa li la yandjwa muOktoba odula ya dja ko. Momapopyo aye, Amushelelo okwa ti Shikongo ina landulwa a dule okukalela po oshiponga osho shomahauto e lidenga mumwe, ndee ta ti naku pulwe opo Shikongo a mangwe po shi na sha noshiponga, osho sha ya neemwenyo dovanhu vatatu. Shikongo ota ti kutya omapopyo aAmushelelo “okwa hala kutya oda ninga edipao liheshi loshiningilewina” nota “ ti kutya kakwa li nda ungaungwa naame ngaashi ovanhu aveshe nokwa li nda pulwa ndi kalele po osho nda ninga”. Shikongo ota ti oshinima eshi otashi ningwa nande Amushelelo okwa lombwelwa kutya epeko lopolifi lomakonakono oshiponga shinyanyalifa ola tuminwa kombelewa yomutamanekindjai opo ku ningwe etokolo ngee ota tamanekwa shi na sha noshiningwanima osho. Shikongo natango momukandaano wa yandjwa komhangu okwa ti: “Oshinima osho sha shangwa koFacebook oshi na omalundilo a kula oo taa dulu kweeta oshiwana shi kanife elineekelo mwaame ongokomufalandjai wopolifi yaNamibia nomoshikondo shopolifi ashishe, osho tashi dulu okunghudipaleka oilonga yopolifi neameno lopashiwana. “Ombelewa yange yekotamhango oya pulwa elineekelo loshiwana opo i longe nawa, ndee omapopyo oo taa ningwa otaa teya elineekelo eli.” Amushelelo okwa li momhangu Omaandaxa nokwa lombwela Hans-Kaumbi kutya okwa tameka oshikonga shokwoongela oimaliwa yomukalelipo wopaveta opo e mu kalele po moshikumungu omu. Amushelelo okwa ti okwa ongela po oshimaliwa shi fike poN$32 000 fiyo opapa, nokwa pumbwa oshimaliwa shi fike poN$100 000 opo a konge hahende waye oo a hala e mu kalele po. Okwa pula Hans-Kaumbi opo a undulile oihokolola yeindilo lomeendelelo kEtitano, opo a dule okwoongela oimaliwa ya wana yomukalelipo waye wopaveta. Ashike nee, Hans-Kaumbi okwa li ashike e mu pa fiyo omutenya wOmaandaxa opo a dule okwaalukila komhangu nomukalelipo wopaveta, nokwa li e mu lombwela kutya oihokolola otai ka twikila ashike omutenya oo. Eshi kwa li a popya kutya oshikumungu otashi twikile nande Amushelelo natango ke na omukalelipo wopaveta, okwa nyenyeta kutya oshinima osho otashi teya oufemba waye, oku mu ekela komesho yembungu a fa odi, nokwa li a lombwela omhupanguli kutya okwa hala a ninge eindilo opo a kufwe mo moshibofa. Amushelelo okwa li a pewa efimbo opo a ninge eindilo omhupanguli a dje mo moshibofa. Hahende waShikongo Nambili Mhata, okwa li aanya eindilo eli tali pula omhupanguli a dje mo moshibofa. The post Amushelelo ota futifwa komukulunhu wopolifi appeared first on The Namibian.

#Namibia #Amushelelo #Shikongo #Omaandaxa #MichaelAmushelelo